Skriftuurlike Akkuraatheid van die Verbondsdoop - Punt A

In die Inleiding van hierdie artikel reeks het ek tien punte t.o.v. die NG Kerk Doopformulier (DF) gekies waarna ek in meer diepte wil kyk, en graag teen die Woord van God wil meet. In hierdie boodskap kyk ons na die volgende stelling in die DF: "Ten spyte van ons kinders se sondige natuur behoort hulle in Christus aan God"

Hierdie stelling van die DF impliseer dat kinders deur die verbondsdoop deur Christus aan God behoort. Maar is dit moontlik om slegs op grond van 'n verbondsdoop aan God te behoort?

Rom 8:5-9 "Want die wat vleeslik is, bedink vleeslike dinge, maar die wat geestelik is, geestelike dinge. Want wat die vlees bedink, is die dood, maar wat die Gees bedink, is lewe en vrede, omdat wat die vlees bedink, vyandskap teen God is; want dit onderwerp hom nie aan die wet van God nie, want dit kan ook nie. En die wat in die vlees is, kan God nie behaag nie; julle is egter nie in die vlees nie, maar in die Gees, as naamlik die Gees van God in julle woon. Maar as iemand die Gees van Christus nie het nie, dié behoort nie aan Hom nie."

In hierdie teks is die Woord selektief. Dit spesifiseer dat mense wat in die vlees wandel (ongelowige mense), nie aan Christus behoort nie. Slegs mense wat in die Gees wandel, behoort aan Hom. Nie net behoort mense in die Gees aan Christus, maar so ook deur Christus aan God.

1 Kor 3:16-23 "Weet julle nie dat julle 'n tempel van God is en die Gees van God in julle woon nie? ... Laat niemand dan op mense roem nie, want alles behoort aan julle; of dit Paulus is of Apollos of Céfas of die wêreld of lewe of dood of teenswoordige of toekomstige dinge — alles behoort aan julle; maar julle behoort aan Christus, en Christus aan God."

Hierdie teks verwysing bevestig die vorige een. Rom 8:5-9 sê duidelik dat mense wat in die vlees wandel en nie in die Gees nie, vleeslik is. Mense wat in die vlees wandel is ongelowige en sondige mense (Rom 7:5), en hulle kan nie aan Christus behoort nie, en so ook nie aan God nie. Die onderskeid is dat slegs mense met die Gees in hulle aan God behoort.

In terme van die verbondsdoop is die vraag dus: Het ons die Gees van geboorte af of kry ons die Gees slegs op 'n sekere punt?

Joh 7:37-39 "En op die laaste dag, die groot dag van die fees, het Jesus gestaan en uitgeroep en gesê: As iemand dors het, laat hom na My toe kom en drink! Hy wat in My glo, soos die Skrif sê: strome van lewende water sal uit sy binneste vloei. En dit het Hy gesê van die Gees wat dié sou ontvang wat in Hom glo; want die Heilige Gees was daar nog nie, omdat Jesus nog nie verheerlik was nie."

Slegs die mense wat in Hom glo sal die Gees ontvang. Let op die volgorde, eers geloof en dan word die Heilige Gees aan die gelowige gegee. Die belofte dat die Heilige Gees uitgestort gaan word aan mense, om in mense te woon, is deur Jesus gemaak voor die Gees vir die eerste keer uitgestort is.

Joh 14:12-26 "Voorwaar, voorwaar Ek sê vir julle, wie in My glo — die werke wat Ek doen, sal hy ook doen; en hy sal groter werke doen as dit, omdat Ek na my Vader gaan. ... En Ek sal die Vader bid, en Hy sal julle 'n ander Trooster gee om by julle te bly tot in ewigheid: die Gees van die waarheid wat die wêreld nie kan ontvang nie, omdat dit Hom nie sien en Hom nie ken nie; maar julle ken Hom, omdat Hy by julle bly en in julle sal wees. ... maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het."

En reeds voor Jesus gekom het is daar al in die Ou Testament dieselfde belofte aan ons gemaak, sien gerus Jes 44:3, Eseg 11:19, Joël 2:28-32. Hierdie belofte is dat die Heilige Gees in gelowiges sal woon. Gelowiges sal Gees vervuld wees, sien Ef 5:18 en 1 Joh 2:20,27. Dit beteken dat ongelowiges nie die Gees in hulle het nie.

Daarom moet die vraag gevra word: Is die stelling van die DF en ook die HK, dat die verbondsdoop kinders deel maak van God deur Christus korrek?

In die lig van bogenoemde verwysings, klop die DF en HK siening nie met die Woord nie. Volgens die Woord behoort slegs mense wat die Gees in hulle het aan God deur Christus. En die Gees word slegs uitgestort wanneer die persoon tot geloof kom. Iemand wie nie in Jesus Christus glo nie is nie gered nie en die bewys is omdat daardie persoon nie die Gees het nie.

Gee die verbondsdoop geloof aan die kindjie? Voorsien die verbondsdoop die kindjie van die inwerking van die Gees? Nee, dit kan en doen ook nie en daar is geen voorbeeld in die Woord van mense wie aan Christus behoort as hulle nie eers persoonlik tot geloof gekom het nie.

In terme van Punt (a) klop die DF nie met die Woord nie. Die DF leer "Ten spyte van ons kinders se sondige natuur behoort hulle in Christus aan God". Hoe? Hoe behoort hulle aan Christus? Die enigste manier is deur geloof en 'n jong kindjie kan nog nie geloof hê nie. Let asb. op dat ek nie impliseer dat so 'n kindjie nie "hemel" toe gaan as hulle sterf nie. Hulle is gered totdat hulle op die ouderdom kom waar hulle self kan kies om in Jesus te glo. In Engels staan die lering as "the age of accountability" bekend. Ek hoop om later meer hieroor te skryf.

In opsomming, geloof is nodig om aan Jesus te behoort. Die verbondsdoop wat aan klein kinders bedien word en aan hulle belowe dat so 'n kindjie aan Jesus behoort en dus gered is, is vals en gee die kindjie en ouers valse hoop. Dit is eerder Bybels om die ouers die vertroue te gee dat hul kindjies reeds sonder die doop veilig in Jesus se hande is omdat hulle verstandelik nog nie vir of teen Hom kan besluit nie. Soos enige ander persoon het elke persoon geloof nodig om wanneer hulle ouer is gered te word. Dan eers word hulle deel van die Liggaam van Christus en word deel van Sy kudde. Mense wie kies om Hom te verwerp is vyande van God al het so 'n persoon die verbondsdoop gehad, sien Rom. 8:5-8.

Ek ken nogal baie mense wie in die kerk grootgeword het en as kinders gedoop is. Die tragiese ding is dat sommige van hulle die kerk opgegee het en ek kan maar net wonder hoekom en of hulle ooit werklik in Jesus as hul Verlosser geglo het.

(Oorspronklik gepubliseer op 21/12/2010 en hersien op 30/04/2018)

Lees meer

Skriftuurlike Akkuraatheid van die Verbondsdoop - Inleiding

Ek skryf hierdie artikel reeks vir bepeinsing t.o.v. die skriftuurlike geldigheid van die verbondsdoop of te wel die kleindoop of kinderdoop soos dit ook bekend staan. Dit word gerig as 'n ope brief aan gelowiges in enige van die Gereformeerde kerke waar die verbondsdoop reeds vir jare in tradisie gebruik word. A.g.v. die verwarring t.o.v. die doop, is hierdie reeks gefokus daarop om die saak van die doop met betrekking tot 'n paar sleutel punte, te verduidelik met die Woord as sentrale uitgangspunt. Hierdie reeks is glad nie 'n volledige ondersoek van die verbondsdoop nie, maar dit hoop, deur 'n paar sleutel verbondsdoop punte teen die Woord te vergelyk, die leser te lei tot verdere in diepte ondersoek. Jy word aangemoedig om steeds met die Bybel in die hand deur die reeks te werk en vir jou self te ontdek wat die Woord leer oor die doop.

Die bespreking in hierdie reeks is gebaseer op die NG Kerk Doopformulier (DF) soos in die algemeen in gebruik geneem deur baie Suid Afrikaanse kerke uit die Reformasie. 'n Kopie van die NG Kerk Doopformulier kan verkry word by:

http://kerkargief.co.za/doks/bely/F_Doop.pdf

Die DF vorm die basis vir die doop van klein kinders en die sleutel punte van hierdie DF word ook geleer in die Heidelbergse Kategismus (HK), en daarom sal deur die DF teen die Woord te vergelyk ter selfde tyd tekortkominge in die HK uitwys word.

Die DF bevat drie beloftes wat die ouers met die doop van hul kind voor die gemeente bevestig:

“Ten eerste: Bely u dat, hoewel ons kinders as sondaars in die wêreld gekom het en daarom onder die oordeel van God staan, hulle nogtans in Christus aan God behoort en daarom as lidmate van sy gemeente gedoop moet word?

Ten tweede: Bely u dat die leer van die Ou en Nuwe Testament wat ook in die artikels van die Christelike geloof vervat is en in die kerk hier geleer word, die ware en volkome leer van die verlossing is?

Ten derde: Beloof u om hierdie kind, van wie u vader en moeder (of voog) is, in dié leer na dié beste van u vermoë te onderrig en te laat onderrig?"

Met die eerste gelofte punt in die DF bely die ouer(s)/voog dat hul kind, ten spyte daarvan dat hulle as sondaars in die wêreld gekom het, steeds:

(a) in Christus aan God behoort en

(b) daarom as lidmaat van Sy gemeente gedoop moet word.

Die DF bevat ook sewe punte om te beskryf wat die doop is:

“Die doop in die Naam van die drie-enige God, Vader, Seun en Heilige Gees, beteken en verkondig:

- dat ons en ons kinders, wat as sondaars in die wêreld gekom het, slegs in die koninkryk van God kan kom as ons opnuut gebore word;

- dat die Here daardeur bevestig dat Hy ons in sy verbond insluit, ons tot sy kinders aanneem en ons deel laat hê aan al die voorregte van die verbond;

- dat ons en ons kinders verbind word aan Christus wat ons sonde deur sy bloed afgewas het;

- dat ons ou, sondige lewe saam met Hom aan die kruis gesterf het en saam met Hom begrawe is, maar dat ons ook weer deur sy opstanding lewend gemaak word sodat "ons vir die sonde dood is en vir God lewe" (Rom 6:11);

- dat die doop 'n seël is van die inlywing in die kerk van Jesus Christus en ons verplig om as lewende lidmate te leef;

- dat ons as gedooptes die Here uit dankbaarheid met ons hele wese moet liefhê, vertrou en dien, en

- dat die Here ons deur hierdie sakrament verséker dat Hy deur sy Gees in ons wil woon en ons lewens daagliks so regeer dat ons hoe langer hoe meer sy beeld vertoon.“

Aangesien die doop volgens die DF 'n teken en seel vir die betrokke kind en ouers is - van die verbond van genade wat God met hulle sluit - is die beskrywing van die verbondsdoop volgens die DF dat:

(c) die Here met die doop ons kinders as Sy kinders aanneem,

(d) die doop ons kinders verbind aan Christus wat ons sondes met Sy bloed af gewas het,

(e) ons kinders se ou sondige lewe saam met Hom aan die kruis gesterf het,

(f) ons kinders ook deur Sy opstanding lewend gemaak word sodat hulle dan vir hul sonde dood is,

(g) die doop ons kinders inlyf as lidmate in die kerk van Jesus Christus,

(h) ons kinders as lewende lidmate moet lewe,

(i) as gedooptes ons kinders uit dankbaarheid die Here moet liefhê, en moet vertrou en dien,

(j) in die doop die Here deur Sy Gees in ons kinders wil woon en hul lewens daagliks wil regeer.

Dit is belangrik om te merk dat bogenoemde punte uit die DF dan volgens die DF vir beide grootmense en kinders wie die verbondsdoop deurgaan geld.

Nou dat jy verstaan wat die standpunt van die DF is, kan ons die punte a tot j (volg die skakels hier bo) wat uit die DF geneem is, een vir een teen die Woord meet.

(Oorspronklik gepubliseer op 21/12/2010 en hersien op 30/04/2018)

Lees meer